中環公利，賣了涼茶蔗水70年，裝潢停留在60年代：涼茶櫃台、紙皮石、海報牌匾、戰前唐樓的格局，卻好像永不過時。鎮店之寶是一台「老爺」榨汁機， 由第一代開店用到今日，每天用完都要清洗乾淨，齒輪生鏽失靈就大件事，因為根本無零件可換。榨蔗汁，看似簡單，但公利由選材到製作都一絲不苟。蔗，指定用廣東南海青蔗，去皮以慢火煮焗兩小時，放涼才榨，屬性溫和，味道清甜。如斯講究，全因公利創辦人原是蔗農出身，主要出售予其他涼茶店做蔗汁，後來發現出售蔗汁利潤更高，1948年於中環開店賣蔗汁。70年代，是涼茶店的黃金時期，火麻仁、菊花茶、廿四味等，大受歡迎；80至90年代，便利店越開越多，樽裝飲品成了主流，令涼茶行業步入寒冬，加上台茶店的興起，更令傳統涼茶舖式微。慶幸，苦盡終於甘來。「近年興懷舊，多咗好多年輕客來幫襯；另外，又有啲學生嚟做訪問，做關於保育的課題，我都會好樂意分享這裏的歷史。」
身穿街坊裝的公利第四代傳人崔文斌（Ben）， 小學三年級起就要到店幫手送貨；長大後，同學都以為他是二太子，撓埋手不用做，實情是他三更半夜還在店裏洗藥材弄龜苓膏。Ben 大專主時修室內設計，畢業後找不到工作，本來只打算短暫在店內幫手，怎料一做便六年。「讀設計最大的得着是學懂如何去思考，可以天馬行空，將一樣嘢放到好大。例如我哋同本地啤酒廠合作，釀製蔗汁味啤酒。以前外國人來到這裏，會好抗拒涼茶，但依家攞支啤酒出嚟，再慢慢介紹呢度嘅歷史，佢哋就易接受喇！」 與時並進，是老店生存之道。數年前，當 Deliveroo 主動斟洽， 邀請公利成為第一家合作送外賣飲品的店舖時，Ben 二話不說就答應。「起初阿爸都唔太贊成搞咁多嘢，上一代思想比較保守，佢以前連傳媒訪問到唔鍾意做，幸好事實證明適當的改革對生意有幫助。」公利除了賣竹蔗水，還有一樣名物，Ben 謂：「蔗汁糕係以前我阿媽成日整俾我同阿哥食，有街坊試過話好食，鼓勵我哋出售。之前中華廚藝學院都邀請了阿媽去教整蔗汁糕呢！」
公利真料竹蔗水
地址：中環荷李活道60號
電話：2544 3571
