奇趣開業於1984年，是本港碩果僅存的舊式唐餅家，更連續多年獲得「米芝蓮街頭小食推介」。老店仍然保存着傳統前舖後工場的格局；綠白的地板階磚、手寫的價錢牌、大燈泡、大牛角扇，還有用大竹筲箕來放出爐唐餅。七十多歲的張銳江是奇趣的創辦人，當年從鄉下來港謀生，做過雜貨店、做過侍應，為了賺多點錢養家，於是便和幾個同鄉一起創立了奇趣餅家，半途出家的他，一做就卅數十載。
「小心！借開呀！」張銳江的兒子 William（張惠寧） 捧着大大盤燒餅從廚房出來。今年31歲的 William，六年前從加拿大多倫多俢讀完心理學，決定回港學做唐餅。他笑説：「冇諗過要繼承父業咁偉大，只因為返嚟幫手有開工有糧出！」話雖如此，但畢竟餅舖不只是爸爸畢生的心血，更是 William 兒時的小樂園。「細個間中會去舖頭攪攪震，最鍾意攞墊蛋撻的咭紙嚟玩；老師傅都知我愛食蛋撻，每次出爐都會拿一件俾我食。」
太子爺學做餅，也沒有得到厚待，一樣朝七晚七，由基本功做起，「第一樣學燒餅，見師傅搓粉糰，以為好易跟住做，點知粉糰原來用滾熱水來開粉而成，我一手插入去，又燙又黏， 差啲燙熟咗！」又如焗光酥餅，火喉最難控制，遲十數秒出爐，可能已經焗燶了。不過 William 說：「做唐餅其實很簡單，又唔係做火箭，不外乎麵粉糖油，搓皮包饀， 做得多就會上手啦！」
近年 William 已全完接手打理店舖，對於做餅，他堅持「不創新 」， keep 住賣13、14款傳統唐餅就好了，「搞太多花款太多口味，客人仲難揀啦！」值得保留的， 還有老店對員工的福利，例如為夥計提供每日兩餐住家福食；每年端午，又會關門數天，出錢請夥計及讓他們携眷一起去旅行。過往去過的地方有馬來西亞、泰國、 杭州等地，今年更會拉大隊去日本大阪，旁人如我聽到都興奮， William 卻不以為意：「 我冇份去呀，要留喺度洗冷氣！」
雖然 William 强調不刻意求變，但年輕人還是勇於新嘗試，如前年餅店和香港航空合作，在航班上輪流供應經典唐餅小食如迷你合桃酥、光酥餅、雞仔餅等，將老餅沖上雲霄；今年又和網店士多合作，反應也不俗，成功將唐餅推至更廣的層面。而去年剛成家立室的 William，會否也希望將手藝傳承下一代？「嘩！冇諗咁遠，我只知道會一直做落去。」
